ตาทิสา ปติ มา ลทฺธา ยา เต อมฺเพ อวาหริ ฯ

[๖๗๖] ทีฆํ คจฺฉตุ อทฺธานํ เอกิกา อภิสาริยา ๑

สงฺเกเต ปติ มาทฺทส ๒ ยา เต อมฺเพ อวาหริ ฯ

อลงฺกตา สุวสนา มาลินี จนฺทนุสฺสทา

[๖๗๗] เอกิกา สยเน เสตุ ยา เต อมฺเพ อวาหรีติ ฯ

อมฺพชาตกํ จตุตฺถํ ฯ

___________

๕ คชกุมฺภชาตกํ

[๖๗๘] วนํ ยทคฺคิ ทหติ ปาวโก กณฺหวตฺตนี

กถํ กโรสิ ปจลก เอวํ ทนฺธปรกฺกโม ฯ

[๖๗๙] พหูนิ รุกฺขฉิทฺทานิ ปฐพฺยา วิวรานิ จ

ตานิ เจ นาภิสมฺโภม โหติ โน กาลปริยาโย ฯ

[๖๘๐] โย ทนฺธกาเล ตรติ ตรณีเย จ ทนฺธติ

สุกฺขปณฺณํว อกฺกมฺม อตฺถํ ภญฺชติ อตฺตโน ฯ

[๖๘๑] โย ทนฺธกาเล ทนฺเธติ ตรณีเย จ ตารยิ

สสีว รตฺตึ วิภชํ ตสฺสตฺโถ ปริปูรตีติ ฯ

คชกุมฺภชาตกํ ปญฺจมํ ฯ

___________

#๑ ม. อภิสาริกา ฯ ๒ ม. มา อทฺท ฯ สี. ยุ. มา อทฺทส ฯ