น จ เม ตาทิโส วณฺโณ จกฺกวาก ยถา ตุวํ ฯ
[๑๔๕๘] สมฺปสฺสํ อตฺตนิ เวรํ หึสาย ๑ มานุสึ ปชํ
อุตฺรโสฺต ฆสสี ภีโต เตน วณฺโณ ตเวทิโส ฯ
[๑๔๕๙] สพฺพโลกวิรุทฺโธสิ ธงฺก ปาเปน กมฺมุนา
ลทฺโธ ปิณฺโฑ น ปีเณติ เตน วณฺโณ ตเวทิโส ฯ
[๑๔๖๐] อหมฺปิ สมฺม ภุญฺชามิ อหึสํ สพฺพปาณินํ
อปฺโปสฺสุกฺโก นิราสงฺโก อโสโก อกุโตภโย ฯ
[๑๔๖๑] โส กรสฺสุ อานุภาวํ วีติวตฺตสฺสุ สีลิยํ
อหึสาย จรํ ๒ โลเก ปิโย โหหิสิ มมฺมิว ฯ
[๑๔๖๒] โย น หนฺติ น ฆาเตติ น ชินาติ น ชาปเย
เมตฺตํ โส สพฺพภูเตสุ เวรํ ตสฺส น เกนจีติ
จกฺกวากชาตกํ เตรสมํ ฯ
____________
๑๔ ภูริปญฺหาชาตกํ
[๑๔๖๓] สจฺจํ กิร ตุวมฺปิ ๓ ภูริปญฺญ
ยา ตาทิสี สิรี ธิติ มติ จ
น ตายเต ภาววสูปนีตํ
โย ยวกํ ภุญฺชสิ อปฺปสูปํ ฯ
[๑๔๖๔] สุขํ ทุกฺเขน ปริปาจยนฺโต
กาลากาลํ วิจินํ ฉนฺทฉนฺโน
#๑ ม. หึสยํ ฯ ๒ ม. จร ฯ ๓ ม. ตฺวํ อปิ ฯ