โย [๑] ตณฺหํ ทุกฺขชนนึ ปริชานาติ ปณฺฑิโตติ ฯ
กามชาตกํ จตุตฺถํ ฯ
___________
๕ ชนสนฺธชาตกํ
[๑๖๔๙] ทส ขลุมานิ ๒ ฐานานิ ยานิ ปุพฺเพ อกริตฺวา
ส ปจฺฉา อนุตปฺปติ อิจฺจาห ราชา ชนสนฺโธ ๓ ฯ
[๑๖๕๐] อลทฺธา วิตฺตํ ๔ ตปติ ปุพฺเพ อสมุทานิตํ
น ปุพฺเพ ธนเมสิสฺสํ อิติ ปจฺฉานุตปฺปติ ฯ
[๑๖๕๑] สกฺยรูปํ ปุเร สนฺตํ มยา สิปฺปํ น สิกฺขิตํ
กิจฺฉา วุตฺติ อสิปฺปสฺส อิติ ปจฺฉานุตปฺปติ ฯ
[๑๖๕๒] กูฏเวที ปุเร อาสึ ปิสุโณ ปิฏฺฐิมํสิโก
จณฺโฑ จ ผรุโส จาสึ ๕ อิติ ปจฺฉานุตปฺปติ ฯ
[๑๖๕๓] ปาณาติปาตี ปุเร อาสึ ลุทฺโท จาปิ อนาริโย
ภูตานํ นาปจายิสฺสํ อิติ ปจฺฉานุตปฺปติ ฯ
[๑๖๕๔] พหูสุ วต สนฺตีสุ อนาปทาสุ อิตฺถิสุ
ปรทารํ อาเสวิสฺสํ อิติ ปจฺฉานุตปฺปติ ฯ
[๑๖๕๕] พหุมฺหิ วต สนฺตมฺหิ อนฺนปาเน อุปฏฺฐิเต
น ปุพฺเพ อททํ ทานํ อิติ ปจฺฉานุตปฺปติ ฯ
[๑๖๕๖] มาตรํ ปิตรํ จาปิ ชิณฺณเก คตโยพฺพเน ๖ #๑ ม. อิมํ ฯ ๒ ม. ขลุ อิมานิ ฯ ๓ ม. อิจฺเจวาห ชนสนฺโธ ฯ ๔ จิตฺตนฺติปิ #ปาโฐ ฯ ๕ ม. จาปิ ฯ ๖ ม.ชิณฺณกํ คตโยพฺพนํ ฯ เอวมุปริปิ ฯ