ปจนฺโต อปจนฺตสฺส อมมสฺส สกิญฺจโน

อนาทานสฺส สาทาโน ทาตุมรหามิ โภชนํ ฯ

[๒๐๓๐] ภิกฺขุญฺจทานิ ปุจฺฉามิ ตุณฺหิมาสีน สุพฺพตํ

อิติ เต ภตฺตํ ปาทาสิ สุจิมํสูปเสจนํ

ตํ ตฺวํ ภตฺตํ ปฏิคฺคยฺห ตุณฺหี ภุญฺชสิ เอกโก

นาญฺญํ กญฺจิ นิมนฺเตสิ โกยํ ธมฺโม นมตฺถุ เต ฯ

[๒๐๓๑] น ปจามิ น ปาเจมิ น ฉินฺทามิ น เฉทเย

ตํ มํ อกิญฺจนํ ญตฺวา สพฺพปาเปหิ อารตํ

วาเมน ภิกฺขมาทาย ทกฺขิเณน กมณฺฑลล

อิสิ เม ภตฺตํ ปาทาสิ สุจิมํสูปเสจนํ ฯ

เอเต หิ ทาตุมรหนฺติ สมฺมา สปริคฺคหา

ปจฺจนีกมหํ มญฺเญ โย ทาตารํ นิมนฺตเย ฯ

[๒๐๓๒] อตฺถาย วต เม อชฺช อิธาคจฺฉิ รเถสโภ

โยหํ อชฺช ปชานามิ ๑ ยตฺถ ทินฺนํ มหปฺผลํ ฯ

รฏฺเฐสุ คิทฺธา ราชาโน กิจฺจากิจฺเจสุ พฺราหฺมณา

อิสี มูลผเล คิทฺธา วิปฺปมุตฺตา จ ภิกฺขโวติ ฯ

ภิกฺขาปรมฺปรชาตกํ เตรสมํ ฯ

____________

#๑ สี. อิโต ปุพฺเพ น ชานามิ ฯ