Tena kho pana samayena ambacorakā ambaṁ pātetvā bhaṇḍikaṁ ādāya agamaṁsu. Sāmikā te corake anubandhiṁsu. Corakā sāmike passitvā bhaṇḍikaṁ pātetvā palāyiṁsu. Bhikkhū—“pure sāmikā passantī”ti, theyyacittā paribhuñjiṁsu. Sāmikā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi …pe… “āpattiṁ tumhe, bhikkhave, āpannā pārājikan”ti. Tena kho pana samayena jambucorakā … labujacorakā … panasacorakā … tālapakkacorakā … ucchucorakā … timbarūsakacorakā timbarūsake uccinitvā bhaṇḍikaṁ ādāya agamaṁsu. Sāmikā te corake anubandhiṁsu. Corakā sāmike passitvā bhaṇḍikaṁ pātetvā palāyiṁsu. Bhikkhū—“pure sāmikā passantī”ti, theyyacittā paribhuñjiṁsu. Sāmikā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi …pe… “āpattiṁ tumhe, bhikkhave, āpannā pārājikan”ti. Tena kho pana samayena aññataro bhikkhu saṅghassa ambaṁ theyyacitto avahari … saṅghassa jambuṁ … saṅghassa labujaṁ … saṅghassa panasaṁ … saṅghassa tālapakkaṁ … saṅghassa ucchuṁ … saṅghassa timbarūsakaṁ theyyacitto avahari. Tassa kukkuccaṁ ahosi …pe… “āpattiṁ tvaṁ, bhikkhu, āpanno pārājikan”ti. Tena kho pana samayena aññataro bhikkhu pupphārāmaṁ gantvā ocitaṁ pupphaṁ pañcamāsagghanakaṁ theyyacitto avahari. Tassa kukkuccaṁ ahosi …pe… “āpattiṁ tvaṁ, bhikkhu, āpanno pārājikan”ti.