Tena kho pana samayena aññataro bhikkhu vihāraṁ chādetvā otarati. Aññataro bhikkhu taṁ bhikkhuṁ etadavoca— “āvuso, ito otarāhī”ti. So tena otaranto paripatitvā kālamakāsi. Tassa kukkuccaṁ ahosi …pe… “anāpatti, bhikkhu, namaraṇādhippāyassā”ti. Tena kho pana samayena aññataro bhikkhu vihāraṁ chādetvā otarati. Aññataro bhikkhu maraṇādhippāyo taṁ bhikkhuṁ etadavoca— “āvuso, ito otarāhī”ti. So tena otaranto paripatitvā kālamakāsi …pe… paripatitvā na kālamakāsi. Tassa kukkuccaṁ ahosi …pe… “anāpatti, bhikkhu, pārājikassa; āpatti thullaccayassā”ti. Tena kho pana samayena aññataro bhikkhu anabhiratiyā pīḷito gijjhakūṭaṁ pabbataṁ abhiruhitvā papāte papatanto aññataraṁ vilīvakāraṁ ottharitvā māresi. Tassa kukkuccaṁ ahosi …pe… “anāpatti, bhikkhu, pārājikassa. Na ca, bhikkhave, attānaṁ pātetabbaṁ. Yo pāteyya, āpatti dukkaṭassā”ti. Tena kho pana samayena chabbaggiyā bhikkhū gijjhakūṭaṁ pabbataṁ abhiruhitvā davāya silaṁ pavijjhiṁsu. Sā aññataraṁ gopālakaṁ ottharitvā māresi. Tesaṁ kukkuccaṁ ahosi …pe… “anāpatti, bhikkhave, pārājikassa. Na ca, bhikkhave, davāya silā pavijjhitabbā. Yo pavijjheyya, āpatti dukkaṭassā”ti.