Tatiyampi kho sā kumārikā mātuyā santike dūtaṁ pāhesi— “ahañhi duggatā dukkhitā, na sukhaṁ labhāmi. Māsaṁyeva maṁ suṇisabhogena bhuñjiṁsu. Tato aparena dāsibhogena bhuñjanti. Āgacchatu me, mātā, maṁ nessatū”ti. Dutiyampi kho sā gaṇakī yenāyasmā udāyī tenupasaṅkami; upasaṅkamitvā āyasmantaṁ udāyiṁ etadavoca— “sā kira, bhante, kumārikā duggatā dukkhitā, na sukhaṁ labhati. Māsaṁyeva naṁ suṇisabhogena bhuñjiṁsu. Tato aparena dāsibhogena bhuñjanti. Vadeyyātha, bhante— ‘māyyo, imaṁ kumārikaṁ dāsibhogena bhuñjittha, suṇisabhogena imaṁ kumārikaṁ bhuñjathā’”ti. “Paṭhamampāhaṁ tehi ājīvakasāvakehi apasādito, gaccha tvaṁ, nāhaṁ gamissāmī”ti. Atha kho sā gaṇakī ujjhāyati khiyyati vipāceti— “evaṁ duggato hotu ayyo udāyī, evaṁ dukkhito hotu ayyo udāyī, evaṁ mā sukhaṁ labhatu ayyo udāyī, yathā me kumārikā duggatā dukkhitā na sukhaṁ labhati pāpikāya sassuyā pāpakena sasurena pāpakena sāmikenā”ti. Sāpi kho kumārikā ujjhāyati khiyyati vipāceti— “evaṁ duggato hotu ayyo udāyī, evaṁ dukkhito hotu ayyo udāyī, evaṁ mā sukhaṁ labhatu ayyo udāyī, yathāhaṁ duggatā dukkhitā na sukhaṁ labhāmi pāpikāya sassuyā pāpakena sasurena pāpakena sāmikenā”ti. Aññāpi itthiyo asantuṭṭhā sassūhi vā sasurehi vā sāmikehi vā, tā evaṁ oyācanti— “evaṁ duggato hotu ayyo udāyī, evaṁ dukkhito hotu ayyo udāyī, evaṁ mā sukhaṁ labhatu ayyo udāyī, yathā mayaṁ duggatā dukkhitā na sukhaṁ labhāma pāpikāhi sassūhi pāpakehi sasurehi pāpakehi sāmikehī”ti. Yā pana tā itthiyo santuṭṭhā sassūhi vā sasurehi vā sāmikehi vā tā evaṁ āyācanti— “evaṁ sukhito hotu ayyo udāyī, evaṁ sajjito hotu ayyo udāyī, evaṁ sukhamedho hotu ayyo udāyī, yathā mayaṁ sukhitā sajjitā sukhamedhā bhaddikāhi sassūhi bhaddakehi sasurehi bhaddakehi sāmikehī”ti.