Soto udañjalaṁ dhāvaṁ, pupphāvaliyaṁ pokkharaṁ; Vālikā kaddamusseko, sayanaṅguṭṭhakena cāti. 1.2. Vinītavatthu Tena kho pana samayena aññatarassa bhikkhuno supinantena asuci mucci. Tassa kukkuccaṁ ahosi— “bhagavatā sikkhāpadaṁ paññattaṁ, kacci nu kho ahaṁ saṅghādisesaṁ āpattiṁ āpanno”ti? Bhagavato etamatthaṁ ārocesi. “Anāpatti, bhikkhu, supinantenā”ti. Tena kho pana samayena aññatarassa bhikkhuno uccāraṁ karontassa asuci mucci. Tassa kukkuccaṁ ahosi …pe… “kiṁcitto tvaṁ, bhikkhū”ti? “Nāhaṁ, bhagavā, mocanādhippāyo”ti. “Anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno passāvaṁ karontassa asuci mucci. Tassa kukkuccaṁ ahosi …pe… “anāpatti, bhikkhu, namocanādhippāyassā”ti. Tena kho pana samayena aññatarassa bhikkhuno kāmavitakkaṁ vitakkentassa asuci mucci. Tassa kukkuccaṁ ahosi …pe… “anāpatti, bhikkhu, vitakkentassā”ti.