Tena kho pana samayena sāvatthiyaṁ saddhā nāma upāsikā mudhappasannā hoti. Sā evaṁdiṭṭhikā hoti— “yā methunaṁ dhammaṁ deti sā aggadānaṁ detī”ti. Sā bhikkhuṁ passitvā etadavoca— “ehi, bhante, methunaṁ dhammaṁ paṭisevā”ti. “Alaṁ, bhagini, netaṁ kappatī”ti. “Ehi, bhante, ūruntarikāya ghaṭṭehi …pe… ehi, bhante, hatthena upakkamitvā mocessāmi, evaṁ te anāpatti bhavissatī”ti. So bhikkhu tathā akāsi. Tassa kukkuccaṁ ahosi …pe… “anāpatti, bhikkhu, pārājikassa. Āpatti saṅghādisesassā”ti. Tena kho pana samayena vesāliyaṁ licchavikumārakā bhikkhuṁ gahetvā bhikkhuniyā vippaṭipādesuṁ … sikkhamānāya vippaṭipādesuṁ … sāmaṇeriyā vippaṭipādesuṁ. Ubho sādiyiṁsu. Ubho nāsetabbā. Ubho na sādiyiṁsu. Ubhinnaṁ anāpatti.