Saṅketakammaṁ nāma saṅketaṁ karoti— “purebhattaṁ vā pacchābhattaṁ vā rattiṁ vā divā vā tena saṅketena taṁ bhaṇḍaṁ avaharā”ti, āpatti dukkaṭassa. Tena saṅketena taṁ bhaṇḍaṁ avaharati, āpatti ubhinnaṁ pārājikassa. Taṁ saṅketaṁ pure vā pacchā vā taṁ bhaṇḍaṁ avaharati, mūlaṭṭhassa anāpatti. Avahārakassa āpatti pārājikassa. Nimittakammaṁ nāma nimittaṁ karoti. Akkhiṁ vā nikhaṇissāmi bhamukaṁ vā ukkhipissāmi sīsaṁ vā ukkhipissāmi, tena nimittena taṁ bhaṇḍaṁ avaharāti, āpatti dukkaṭassa. Tena nimittena taṁ bhaṇḍaṁ avaharati, āpatti ubhinnaṁ pārājikassa. Taṁ nimittaṁ pure vā pacchā vā taṁ bhaṇḍaṁ avaharati, mūlaṭṭhassa anāpatti. Avahārakassa āpatti pārājikassa. Bhikkhu bhikkhuṁ āṇāpeti— “itthannāmaṁ bhaṇḍaṁ avaharā”ti, āpatti dukkaṭassa. So taṁ maññamāno taṁ avaharati, āpatti ubhinnaṁ pārājikassa. Bhikkhu bhikkhuṁ āṇāpeti— “itthannāmaṁ bhaṇḍaṁ avaharā”ti, āpatti dukkaṭassa. So taṁ maññamāno aññaṁ avaharati, mūlaṭṭhassa anāpatti. Avahārakassa āpatti pārājikassa. Bhikkhu bhikkhuṁ āṇāpeti— “itthannāmaṁ bhaṇḍaṁ avaharā”ti, āpatti dukkaṭassa. So aññaṁ maññamāno taṁ avaharati, āpatti ubhinnaṁ pārājikassa. Bhikkhu bhikkhuṁ āṇāpeti— “itthannāmaṁ bhaṇḍaṁ avaharā”ti, āpatti dukkaṭassa. So aññaṁ maññamāno aññaṁ avaharati, mūlaṭṭhassa anāpatti. Avahārakassa āpatti pārājikassa.