Taṁ ñātaṭṭhena ñāṇaṁ, pajānanaṭṭhena paññā. Tena vuccati— “dubhato vuṭṭhānavivaṭṭane paññā magge ñāṇaṁ”. Maggañāṇaniddeso ekādasamo. 1.1.12. Phalañāṇaniddesa Kathaṁ payogappaṭippassaddhipaññā phale ñāṇaṁ? Sotāpattimaggakkhaṇe dassanaṭṭhena sammādiṭṭhi micchādiṭṭhiyā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṁpayogappaṭippassaddhattā uppajjati sammādiṭṭhi. Maggassetaṁ phalaṁ. Abhiniropanaṭṭhena sammāsaṅkappo micchāsaṅkappā vuṭṭhāti tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṁpayogappaṭippassaddhattā uppajjati sammāsaṅkappo. Maggassetaṁ phalaṁ. Pariggahaṭṭhena sammāvācā micchāvācāya vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṁpayogappaṭippassaddhattā uppajjati sammāvācā. Maggassetaṁ phalaṁ. Samuṭṭhānaṭṭhena sammākammanto micchākammantā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṁpayogappaṭippassaddhattā uppajjati sammākammanto. Maggassetaṁ phalaṁ.