Katamā <b>puññavato iddhi?</b> Rājā cakkavattī vehāsaṁ gacchati saddhiṁ caturaṅginiyā senāya, antamaso assabandhagopurise upādāya. Jotikassa gahapatissa puññavato iddhi, jaṭilassa gahapatissa puññavato iddhi, meṇḍakassa gahapatissa puññavato iddhi, ghositassa gahapatissa puññavato iddhi, pañcannaṁ mahāpuññānaṁ puññavato iddhi. Ayaṁ puññavato iddhi. Katamā <b>vijjāmayā iddhi?</b> Vijjādharā vijjaṁ parijappetvā vehāsaṁ gacchanti, ākāse antalikkhe hatthimpi dassenti, assampi dassenti, rathampi dassenti, pattimpi dassenti, vividhampi senābyūhaṁ dassenti. Ayaṁ vijjāmayā iddhi. Kathaṁ <b>tattha tattha sammāpayogapaccayā ijjhanaṭṭhena iddhi?</b> Nekkhammena kāmacchandassa pahānaṭṭho ijjhatīti— tattha tattha sammāpayogapaccayā ijjhanaṭṭhena iddhi. Abyāpādena byāpādassa pahānaṭṭho ijjhatīti— tattha tattha sammāpayogapaccayā ijjhanaṭṭhena iddhi …pe… arahattamaggena sabbakilesānaṁ pahānaṭṭho ijjhatīti— tattha tattha sammāpayogapaccayā ijjhanaṭṭhena iddhi. Evaṁ tattha tattha sammāpayogapaccayā ijjhanaṭṭhena iddhi. Imā dasa iddhiyo. Iddhikathā niṭṭhitā. 3 Paññāvagga 3.3. Abhisamayakathā <b>Abhisamayo</b>ti. Kena abhisameti? Cittena abhisameti.
