Kathaṁ indriyānaṁ ekarasaṭṭhena bhāvanā? Kāmacchandaṁ pajahato nekkhammavasena pañcindriyāni ekarasā hontīti— indriyānaṁ ekarasaṭṭhena bhāvanā. Byāpādaṁ pajahato abyāpādavasena pañcindriyāni ekarasā hontīti— indriyānaṁ ekarasaṭṭhena bhāvanā …pe… sabbakilese pajahato arahattamaggavasena pañcindriyāni ekarasā hontīti— indriyānaṁ ekarasaṭṭhena bhāvanā. Evaṁ indriyānaṁ ekarasaṭṭhena bhāvanā. Kathaṁ tadupagavīriyavāhanaṭṭhena bhāvanā? Kāmacchandaṁ pajahato nekkhammavasena vīriyaṁ vāhetīti— tadupagavīriyavāhanaṭṭhena bhāvanā. Byāpādaṁ pajahato abyāpādavasena vīriyaṁ vāhetīti— tadupagavīriyavāhanaṭṭhena bhāvanā …pe… sabbakilese pajahato arahattamaggavasena vīriyaṁ vāhetīti— tadupagavīriyavāhanaṭṭhena bhāvanā. Evaṁ tadupagavīriyavāhanaṭṭhena bhāvanā. Kathaṁ āsevanaṭṭhena bhāvanā? Kāmacchandaṁ pajahanto nekkhammaṁ āsevatīti— āsevanaṭṭhena bhāvanā. Byāpādaṁ pajahanto abyāpādaṁ āsevatīti— āsevanaṭṭhena bhāvanā …pe… sabbakilese pajahanto arahattamaggaṁ āsevatīti— āsevanaṭṭhena bhāvanā. Evaṁ āsevanaṭṭhena bhāvanā.