Anattato manasikaronto abhinivesā muccatīti— suññato vimokkho. Yena suñño, tena nimittena animittoti— animitto vimokkho. Yena nimittena animitto, tattha na paṇidahatīti— appaṇihito vimokkho. Yattha na paṇidahati, tena suññoti— suññato vimokkho. Evaṁ samodhānaṭṭhena adhigamanaṭṭhena paṭilābhaṭṭhena paṭivedhaṭṭhena sacchikiriyaṭṭhena phassanaṭṭhena abhisamayaṭṭhena tayo vimokkhā ekakkhaṇe honti. Imehi sattahākārehi tayo vimokkhā ekakkhaṇe honti. Atthi vimokkho, atthi mukhaṁ, atthi vimokkhamukhaṁ, atthi vimokkhapaccanīkaṁ, atthi vimokkhānulomaṁ, atthi vimokkhavivaṭṭo, atthi vimokkhabhāvanā, atthi vimokkhappaṭippassaddhi. Katamo <b>vimokkho?</b> Suññato vimokkho, animitto vimokkho, appaṇihito vimokkho. Katamo suññato vimokkho? Aniccānupassanañāṇaṁ niccato abhinivesā muccatīti— suññato vimokkho. Dukkhānupassanañāṇaṁ sukhato abhinivesā muccatīti— suññato vimokkho. Anattānupassanañāṇaṁ attato abhinivesā muccatīti— suññato vimokkho. Nibbidānupassanañāṇaṁ nandiyā abhinivesā muccatīti— suññato vimokkho. Virāgānupassanañāṇaṁ rāgato abhinivesā muccatīti— suññato vimokkho. Nirodhānupassanañāṇaṁ samudayato abhinivesā muccatīti— suññato vimokkho. Paṭinissaggānupassanañāṇaṁ ādānato abhinivesā muccatīti— suññato vimokkho. Animittānupassanañāṇaṁ nimittato abhinivesā muccatīti— suññato vimokkho. Appaṇihitānupassanañāṇaṁ paṇidhiyā abhinivesā muccatīti— suññato vimokkho. Suññatānupassanañāṇaṁ sabbābhinivesehi muccatīti— suññato vimokkho.