Aniccānupassanañāṇaṁ katamehi tīhupādānehi muccati? Diṭṭhupādānā, sīlabbatupādānā, attavādupādānā— aniccānupassanañāṇaṁ imehi tīhupādānehi muccati. Dukkhānupassanañāṇaṁ katamā ekupādānā muccati? Kāmupādānā— dukkhānupassanañāṇaṁ idaṁ ekupādānā muccati. Anattānupassanañāṇaṁ katamehi tīhupādānehi muccati? Diṭṭhupādānā, sīlabbatupādānā, attavādupādānā— anattānupassanañāṇaṁ imehi tīhupādānehi muccati. Nibbidānupassanañāṇaṁ katamā ekupādānā muccati? Kāmupādānā— nibbidānupassanañāṇaṁ idaṁ ekupādānā muccati. Virāgānupassanañāṇaṁ katamā ekupādānā muccati? Kāmupādānā— virāgānupassanañāṇaṁ idaṁ ekupādānā muccati. Nirodhānupassanañāṇaṁ katamehi catūhupādānehi muccati? Kāmupādānā, diṭṭhupādānā, sīlabbatupādānā, attavādupādānā— nirodhānupassanañāṇaṁ imehi catūhupādānehi muccati. Paṭinissaggānupassanañāṇaṁ katamehi catūhupādānehi muccati? Kāmupādānā, diṭṭhupādānā, sīlabbatupādānā, attavādupādānā— paṭinissaggānupassanañāṇaṁ imehi catūhupādānehi muccati. Animittānupassanañāṇaṁ katamehi tīhupādānehi muccati? Diṭṭhupādānā, sīlabbatupādānā, attavādupādānā— animittānupassanañāṇaṁ imehi tīhupādānehi muccati. Appaṇihitānupassanañāṇaṁ katamā ekupādānā muccati? Kāmupādānā— appaṇihitānupassanañāṇaṁ idaṁ ekupādānā muccati. Suññatānupassanañāṇaṁ katamehi tīhupādānehi muccati? Diṭṭhupādānā, sīlabbatupādānā, attavādupādānā— suññatānupassanañāṇaṁ imehi tīhupādānehi muccati. Yañca aniccānupassanañāṇaṁ, yañca anattānupassanañāṇaṁ, yañca animittānupassanañāṇaṁ, yañca suññatānupassanañāṇaṁ— imāni cattāri ñāṇāni tīhupādānehi muccanti— diṭṭhupādānā, sīlabbatupādānā, attavādupādānā. Yañca dukkhānupassanañāṇaṁ, yaṁ ca nibbidānupassanañāṇaṁ, yañca virāgānupassanañāṇaṁ, yañca appaṇihitānupassanañāṇaṁ— imāni cattāri ñāṇāni ekupādānā muccanti— kāmupādānā. Yañca nirodhānupassanañāṇaṁ, yañca paṭinissaggānupassanañāṇaṁ— imāni dve ñāṇāni catūhupādānehi muccanti— kāmupādānā, diṭṭhupādānā, sīlabbatupādānā, attavādupādānā— ayaṁ anupādācittassa vimokkho. Vimokkhakathāya paṭhamabhāṇavāro.