Kathaṁ <b>saṅkhāravantaṁ attānaṁ samanupassati?</b> Idhekacco viññāṇaṁ … rūpaṁ … vedanaṁ … saññaṁ attato samanupassati. Tassa evaṁ hoti— “ayaṁ kho me attā. So kho pana me ayaṁ attā imehi saṅkhārehi saṅkhāravā”ti. Saṅkhāravantaṁ attānaṁ samanupassati. Seyyathāpi rukkho chāyāsampanno assa. Tamenaṁ puriso evaṁ vadeyya— “ayaṁ rukkho, ayaṁ chāyā. Añño rukkho, aññā chāyā. So kho panāyaṁ rukkho imāya chāyāya chāyāvā”ti. Chāyāvantaṁ rukkhaṁ samanupassati. Evamevaṁ idhekacco viññāṇaṁ … rūpaṁ … vedanaṁ … saññaṁ attato samanupassati. Tassa evaṁ hoti— “ayaṁ kho me attā. So kho pana me ayaṁ attā. Imehi saṅkhārehi saṅkhāravā”ti. Saṅkhāravantaṁ attānaṁ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṁ vatthu. Yā ca diṭṭhi yañca vatthu— ayaṁ dutiyā saṅkhāravatthukā attānudiṭṭhi. Attānudiṭṭhi micchādiṭṭhi …pe… imāni saññojanāni, na ca diṭṭhiyo. Evaṁ saṅkhāravantaṁ attānaṁ samanupassati. Kathaṁ <b>attani saṅkhāre samanupassati?</b> Idhekacco viññāṇaṁ … rūpaṁ … vedanaṁ … saññaṁ attato samanupassati. Tassa evaṁ hoti— “ayaṁ kho me attā. Imasmiñca pana attani ime saṅkhārā”ti. Attani saṅkhāre samanupassati. Seyyathāpi pupphaṁ gandhasampannaṁ assa. Tamenaṁ puriso evaṁ vadeyya— “idaṁ pupphaṁ, ayaṁ gandho; aññaṁ pupphaṁ, añño gandho. So kho panāyaṁ gandho imasmiṁ pupphe”ti. Pupphasmiṁ gandhaṁ samanupassati. Evamevaṁ idhekacco viññāṇaṁ … rūpaṁ … vedanaṁ … saññaṁ attato samanupassati. Tassa evaṁ hoti— “ayaṁ kho me attā. Imasmiñca pana attani ime saṅkhārā”ti. Attani saṅkhāre samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṁ vatthu. Yā ca diṭṭhi yañca vatthu— ayaṁ tatiyā saṅkhāravatthukā attānudiṭṭhi. Attānudiṭṭhi micchādiṭṭhi …pe… imāni saññojanāni, na ca diṭṭhiyo. Evaṁ attani saṅkhāre samanupassati.