Katamaṁ taṁ sīlaṁ na jīvitapariyantaṁ? Idhekacco jīvitahetu jīvitapaccayā jīvitakāraṇā yathāsamādinnaṁ sikkhāpadaṁ vītikkamāya cittampi na uppādeti, kiṁ so vītikkamissati. Idaṁ taṁ sīlaṁ na jīvitapariyantaṁ. Evarūpāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni avippaṭisāravatthukāni pāmojjavatthukāni pītivatthukāni passaddhivatthukāni sukhavatthukāni samādhivatthukāni yathābhūtañāṇadassanavatthukāni ekantanibbidāya virāgāya nirodhāya upasamāya abhiññāya sambodhāya nibbānāya saṁvattanti— idaṁ taṁ sīlaṁ apariyantaṁ. Kiṁ sīlaṁ? Kati sīlāni? Kiṁ samuṭṭhānaṁ sīlaṁ? Kati dhammasamodhānaṁ sīlaṁ? <b>Kiṁ sīlan</b>ti cetanā sīlaṁ, cetasikaṁ sīlaṁ, saṁvaro sīlaṁ, avītikkamo sīlaṁ. <b>Kati sīlānī</b>ti tīṇi sīlāni— kusalasīlaṁ, akusalasīlaṁ, abyākatasīlaṁ. <b>Kiṁ samuṭṭhānaṁ sīlan</b>ti kusalacittasamuṭṭhānaṁ kusalasīlaṁ, akusalacittasamuṭṭhānaṁ akusalasīlaṁ, abyākatacittasamuṭṭhānaṁ abyākatasīlaṁ. <b>Kati dhammasamodhānaṁ sīlan</b>ti saṁvarasamodhānaṁ sīlaṁ, avītikkamasamodhānaṁ sīlaṁ, tathābhāve jātacetanāsamodhānaṁ sīlaṁ.