Aṭṭha dhammā pariññeyyā— aṭṭha lokadhammā. Nava dhammā pariññeyyā— nava sattāvāsā. Dasa dhammā pariññeyyā— dasāyatanāni. [10] “Sabbaṁ, bhikkhave, pariññeyyaṁ. Kiñca, bhikkhave, sabbaṁ pariññeyyaṁ? Cakkhu, bhikkhave, pariññeyyaṁ; rūpā pariññeyyā; cakkhuviññāṇaṁ pariññeyyaṁ; cakkhusamphasso pariññeyyo; yampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi pariññeyyaṁ. Sotaṁ pariññeyyaṁ; saddā pariññeyyā …pe… ghānaṁ pariññeyyaṁ, gandhā pariññeyyā … jivhā pariññeyyā; rasā pariññeyyā … kāyo pariññeyyo; phoṭṭhabbā pariññeyyā …pe… mano pariññeyyo; dhammā pariññeyyā … manoviññāṇaṁ pariññeyyaṁ; manosamphasso pariññeyyo; yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi pariññeyyaṁ”. Rūpaṁ pariññeyyaṁ … vedanā pariññeyyā … saññā pariññeyyā … saṅkhārā pariññeyyā … viññāṇaṁ pariññeyyaṁ … cakkhu pariññeyyaṁ …pe… jarāmaraṇaṁ pariññeyyaṁ …pe… amatogadhaṁ nibbānaṁ pariyosānaṭṭhena pariññeyyaṁ. Yesaṁ yesaṁ dhammānaṁ paṭilābhatthāya vāyamantassa te te dhammā paṭiladdhā honti, evaṁ te dhammā pariññātā ceva honti tīritā ca.