Aniccato manasikaroto kiṁ paṭisaṅkhā ñāṇaṁ uppajjati? Dukkhato manasikaroto kiṁ paṭisaṅkhā ñāṇaṁ uppajjati? Anattato manasikaroto kiṁ paṭisaṅkhā ñāṇaṁ uppajjati? Aniccato manasikaroto nimittaṁ paṭisaṅkhā ñāṇaṁ uppajjati. Dukkhato manasikaroto pavattaṁ paṭisaṅkhā ñāṇaṁ uppajjati. Anattato manasikaroto nimittañca pavattañca paṭisaṅkhā ñāṇaṁ uppajjati. Yā ca muccitukamyatā yā ca paṭisaṅkhānupassanā yā ca saṅkhārupekkhā, ime dhammā nānatthā ceva nānābyañjanā ca, udāhu ekatthā, byañjanameva nānanti? Yā ca muccitukamyatā yā ca paṭisaṅkhānupassanā yā ca saṅkhārupekkhā, ime dhammā ekatthā, byañjanameva nānaṁ. Aniccato manasikaroto kuto cittaṁ vuṭṭhāti, kattha cittaṁ pakkhandati? Dukkhato manasikaroto kuto cittaṁ vuṭṭhāti, kattha cittaṁ pakkhandati? Anattato manasikaroto kuto cittaṁ vuṭṭhāti, kattha cittaṁ pakkhandati? Aniccato manasikaroto nimittā cittaṁ vuṭṭhāti, animitte cittaṁ pakkhandati. Dukkhato manasikaroto pavattā cittaṁ vuṭṭhāti, appavatte cittaṁ pakkhandati. Anattato manasikaroto nimittā ca pavattā ca cittaṁ vuṭṭhāti, animitte appavatte nirodhe nibbānadhātuyā cittaṁ pakkhandati. Yā ca bahiddhāvuṭṭhānavivaṭṭane paññā ye ca gotrabhū dhammā, ime dhammā nānatthā ceva nānābyañjanā ca, udāhu ekatthā, byañjanameva nānanti? Yā ca bahiddhāvuṭṭhānavivaṭṭane paññā ye ca gotrabhū dhammā, ime dhammā ekatthā, byañjanameva nānaṁ.