Aniccānupassanā bhāvitā bahulīkatā katamaṁ paññaṁ paripūreti? Dukkhānupassanā bhāvitā bahulīkatā katamaṁ paññaṁ paripūreti? Anattānupassanā bhāvitā bahulīkatā katamaṁ paññaṁ paripūreti …pe… paṭinissaggānupassanā bhāvitā bahulīkatā katamaṁ paññaṁ paripūreti? Aniccānupassanā bhāvitā bahulīkatā javanapaññaṁ paripūreti. Dukkhānupassanā bhāvitā bahulīkatā nibbedhikapaññaṁ paripūreti. Anattānupassanā bhāvitā bahulīkatā mahāpaññaṁ paripūreti. Nibbidānupassanā bhāvitā bahulīkatā tikkhapaññaṁ paripūreti. Virāgānupassanā bhāvitā bahulīkatā vipulapaññaṁ paripūreti. Nirodhānupassanā bhāvitā bahulīkatā gambhīrapaññaṁ paripūreti. Paṭinissaggānupassanā bhāvitā bahulīkatā asāmantapaññaṁ paripūreti. Imā satta paññā bhāvitā bahulīkatā paṇḍiccaṁ paripūrenti. Imā aṭṭha paññā bhāvitā bahulīkatā puthupaññaṁ paripūrenti. Imā nava paññā bhāvitā bahulīkatā hāsapaññaṁ paripūrenti. Hāsapaññā paṭibhānapaṭisambhidā. Tassā atthavavatthānato atthapaṭisambhidā adhigatā hoti sacchikatā phassitā paññāya. Dhammavavatthānato dhammapaṭisambhidā adhigatā hoti sacchikatā phassitā paññāya. Niruttivavatthānato niruttipaṭisambhidā adhigatā hoti sacchikatā phassitā paññāya. Paṭibhānavavatthānato paṭibhānapaṭisambhidā adhigatā hoti sacchikatā phassitā paññāya. Tassimā catasso paṭisambhidāyo adhigatā honti sacchikatā phassitā paññāya.