<b>Ñāṇan</b>ti kāmacchandassa pahīnattā nekkhammaṁ ñātaṭṭhena ñāṇaṁ; byāpādassa pahīnattā abyāpādo ñātaṭṭhena ñāṇaṁ …pe… sabbakilesānaṁ pahīnattā arahattamaggo ñātaṭṭhena ñāṇaṁ. <b>Dassanan</b>ti kāmacchandassa pahīnattā nekkhammaṁ diṭṭhattā dassanaṁ. Byāpādassa pahīnattā abyāpādo diṭṭhattā dassanaṁ …pe… sabbakilesānaṁ pahīnattā arahattamaggo diṭṭhattā dassanaṁ. <b>Visuddhī</b>ti kāmacchandaṁ pajahanto nekkhammena visujjhati. Byāpādaṁ pajahanto abyāpādena visujjhati …pe… sabbakilese pajahanto arahattamaggena visujjhati. <b>Nekkhamman</b>ti kāmānametaṁ nissaraṇaṁ, yadidaṁ nekkhammaṁ. Rūpānametaṁ nissaraṇaṁ, yadidaṁ āruppaṁ. Yaṁ kho pana kiñci bhūtaṁ saṅkhataṁ paṭiccasamuppannaṁ, nirodho tassa nekkhammaṁ. Byāpādassa abyāpādo nekkhammaṁ. Thinamiddhassa ālokasaññā nekkhammaṁ …pe… sabbakilesānaṁ arahattamaggo nekkhammaṁ. <b>Nissaraṇan</b>ti kāmānametaṁ nissaraṇaṁ, yadidaṁ nekkhammaṁ. Rūpānametaṁ nissaraṇaṁ, yadidaṁ āruppaṁ. Yaṁ kho pana kiñci bhūtaṁ saṅkhataṁ paṭiccasamuppannaṁ, nirodho tassa nissaraṇaṁ. Kāmacchandassa nekkhammaṁ nissaraṇaṁ. Byāpādassa abyāpādo nissaraṇaṁ …pe… sabbakilesānaṁ arahattamaggo nissaraṇaṁ.