Kathaṁ “ime dhammā pahātabbā”ti sotāvadhānaṁ, taṁpajānanā paññā sutamaye ñāṇaṁ? Eko dhammo pahātabbo— asmimāno. Dve dhammā pahātabbā— avijjā ca bhavataṇhā ca. Tayo dhammā pahātabbā— tisso taṇhā. Cattāro dhammā pahātabbā— cattāro oghā. Pañca dhammā pahātabbā— pañca nīvaraṇāni. Cha dhammā pahātabbā— cha taṇhākāyā. Satta dhammā pahātabbā— sattānusayā. Aṭṭha dhammā pahātabbā— aṭṭha micchattā. Nava dhammā pahātabbā— nava taṇhāmūlakā. Dasa dhammā pahātabbā— dasa micchattā. Dve pahānāni— samucchedappahānaṁ, paṭippassaddhippahānaṁ. Samucchedappahānañca lokuttaraṁ khayagāmimaggaṁ bhāvayato; paṭippassaddhippahānañca phalakkhaṇe. Tīṇi pahānāni— kāmānametaṁ nissaraṇaṁ yadidaṁ nekkhammaṁ; rūpānametaṁ nissaraṇaṁ yadidaṁ āruppaṁ; yaṁ kho pana kiñci bhūtaṁ saṅkhataṁ paṭiccasamuppannaṁ, nirodho tassa nissaraṇaṁ. Nekkhammaṁ paṭiladdhassa kāmā pahīnā ceva honti pariccattā ca. Āruppaṁ paṭiladdhassa rūpā pahīnā ceva honti pariccattā ca. Nirodhaṁ paṭiladdhassa saṅkhārā pahīnā ceva honti pariccattā ca.