Kathaṁ puthunānattatejapariyādāne paññā sallekhaṭṭhe ñāṇaṁ? <b>Puthū</b>ti— rāgo puthu, doso puthu, moho puthu, kodho …pe… upanāho … makkho … paḷāso … issā … macchariyaṁ … māyā … sāṭheyyaṁ … thambho … sārambho … māno … atimāno … mado … pamādo … sabbe kilesā … sabbe duccaritā … sabbe abhisaṅkhārā … sabbe bhavagāmikammā. <b>Nānattekattan</b>ti kāmacchando nānattaṁ, nekkhammaṁ ekattaṁ. Byāpādo nānattaṁ, abyāpādo ekattaṁ. Thinamiddhaṁ nānattaṁ, ālokasaññā ekattaṁ. Uddhaccaṁ nānattaṁ, avikkhepo ekattaṁ. Vicikicchā nānattaṁ, dhammavavatthānaṁ ekattaṁ. Avijjā nānattaṁ, ñāṇaṁ ekattaṁ. Arati nānattaṁ, pāmojjaṁ ekattaṁ. Nīvaraṇā nānattaṁ, paṭhamaṁ jhānaṁ ekattaṁ …pe… sabbe kilesā nānattaṁ, arahattamaggo ekattaṁ. <b>Tejo</b>ti pañca tejā— caraṇatejo, guṇatejo, paññātejo, puññatejo, dhammatejo. Caraṇatejena tejitattā dussīlyatejaṁ pariyādiyati. Guṇatejena tejitattā aguṇatejaṁ pariyādiyati. Paññātejena tejitattā duppaññatejaṁ pariyādiyati. Puññatejena tejitattā apuññatejaṁ pariyādiyati. Dhammatejena tejitattā adhammatejaṁ pariyādiyati.
