Tisso bhāvanā— rūpāvacarakusalānaṁ dhammānaṁ bhāvanā, arūpāvacarakusalānaṁ dhammānaṁ bhāvanā, apariyāpannakusalānaṁ dhammānaṁ bhāvanā. Rūpāvacarakusalānaṁ dhammānaṁ bhāvanā atthi hīnā, atthi majjhā, atthi paṇītā. Arūpāvacarakusalānaṁ dhammānaṁ bhāvanā atthi hīnā, atthi majjhā, atthi paṇītā. Apariyāpannakusalānaṁ dhammānaṁ bhāvanā paṇītā. Catasso bhāvanā— dukkhasaccaṁ pariññāpaṭivedhaṁ paṭivijjhanto bhāveti, samudayasaccaṁ pahānappaṭivedhaṁ paṭivijjhanto bhāveti, nirodhasaccaṁ sacchikiriyāpaṭivedhaṁ paṭivijjhanto bhāveti, maggasaccaṁ bhāvanāpaṭivedhaṁ paṭivijjhanto bhāveti. Imā catasso bhāvanā. [4] Aparāpi catasso bhāvanā— esanābhāvanā, paṭilābhabhāvanā, ekarasabhāvanā, āsevanābhāvanā. Katamā esanābhāvanā? Sabbesaṁ samādhiṁ samāpajjantānaṁ tattha jātā dhammā ekarasā hontīti— ayaṁ esanābhāvanā. Katamā paṭilābhabhāvanā? Sabbesaṁ samādhiṁ samāpannānaṁ tattha jātā dhammā aññamaññaṁ nātivattantīti— ayaṁ paṭilābhabhāvanā.