<b>Abbhā muttova candimā</b>ti yathā abbhā, evaṁ kilesā. Yathā cando, evaṁ ariyañāṇaṁ. Yathā candimā devaputto, evaṁ bhikkhu. Yathā cando abbhā mutto mahikā mutto dhūmarajā mutto rāhugahaṇā vippamutto bhāsate ca tapate ca virocate ca, evamevaṁ bhikkhu sabbakilesehi vippamutto bhāsate ca tapate ca virocate ca. Tena vuccati— “abbhā muttova candimā”ti. Imāni terasa vodāne ñāṇāni. Vodānañāṇaniddeso catuttho. Bhāṇavāro. 1.3.5. Satokāriñāṇaniddesa Katamāni bāttiṁsa satokārissa ñāṇāni? Idha bhikkhu araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā. So satova assasati sato passasati. Dīghaṁ vā assasanto “dīghaṁ assasāmī”ti pajānāti. Dīghaṁ vā passasanto “dīghaṁ passasāmī”ti pajānāti. Rassaṁ vā assasanto “rassaṁ assasāmī”ti pajānāti. Rassaṁ vā passasanto “rassaṁ passasāmī”ti pajānāti. “Sabbakāyapaṭisaṁvedī assasissāmī”ti sikkhati. “Sabbakāyapaṭisaṁvedī passasissāmī”ti sikkhati. “Passambhayaṁ kāyasaṅkhāraṁ assasissāmī”ti sikkhati. “Passambhayaṁ kāyasaṅkhāraṁ passasissāmī”ti sikkhati. Pītipaṭisaṁvedī …pe… sukhapaṭisaṁvedī … cittasaṅkhārapaṭisaṁvedī … passambhayaṁ cittasaṅkhāraṁ … cittapaṭisaṁvedī … abhippamodayaṁ cittaṁ … samādahaṁ cittaṁ … vimocayaṁ cittaṁ … aniccānupassī … virāgānupassī … nirodhānupassī … “paṭinissaggānupassī assasissāmī”ti sikkhati. “Paṭinissaggānupassī passasissāmī”ti sikkhati.