“Sabbaṁ, bhikkhave, sacchikātabbaṁ. Kiñca, bhikkhave, sabbaṁ sacchikātabbaṁ? Cakkhu, bhikkhave, sacchikātabbaṁ; rūpā sacchikātabbā; cakkhuviññāṇaṁ sacchikātabbaṁ; cakkhusamphasso sacchikātabbo; yampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi sacchikātabbaṁ. Sotaṁ sacchikātabbaṁ; saddā sacchikātabbā …pe… ghānaṁ sacchikātabbaṁ; gandhā sacchikātabbā … jivhā sacchikātabbā; rasā sacchikātabbā … kāyo sacchikātabbo; phoṭṭhabbā sacchikātabbā … mano sacchikātabbo; dhammā sacchikātabbā; manoviññāṇaṁ sacchikātabbaṁ; manosamphasso sacchikātabbo; yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi sacchikātabbaṁ”. Rūpaṁ passanto sacchikaroti, vedanaṁ passanto sacchikaroti, saññaṁ passanto sacchikaroti, saṅkhāre passanto sacchikaroti, viññāṇaṁ passanto sacchikaroti. Cakkhuṁ …pe… jarāmaraṇaṁ …pe… amatogadhaṁ nibbānaṁ pariyosānaṭṭhena passanto sacchikaroti. Ye ye dhammā sacchikatā honti te te dhammā phassitā honti. Taṁ ñātaṭṭhena ñāṇaṁ, pajānanaṭṭhena paññā. Tena vuccati— “ime dhammā sacchikātabbāti sotāvadhānaṁ, taṁpajānanā paññā sutamaye ñāṇan”ti. Kathaṁ “ime dhammā hānabhāgiyā, ime dhammā ṭhitibhāgiyā, ime dhammā visesabhāgiyā, ime dhammā nibbedhabhāgiyā”ti sotāvadhānaṁ, taṁpajānanā paññā sutamaye ñāṇaṁ? Paṭhamassa jhānassa lābhiṁ kāmasahagatā saññāmanasikārā samudācaranti— hānabhāgiyo dhammo. Tadanudhammatā sati santiṭṭhati— ṭhitibhāgiyo dhammo. Avitakkasahagatā saññāmanasikārā samudācaranti— visesabhāgiyo dhammo. Nibbidāsahagatā saññāmanasikārā samudācaranti virāgūpasaṁhitā— nibbedhabhāgiyo dhammo.