Evaṁ sante vātūpaladdhiyā ca pabhāvanā hoti, assāsapassāsānañca pabhāvanā hoti, ānāpānassatiyā ca pabhāvanā hoti, ānāpānassatisamādhissa ca pabhāvanā hoti; tañca naṁ samāpattiṁ paṇḍitā samāpajjantipi vuṭṭhahantipi. Passambhayaṁ kāyasaṅkhāraṁ assāsapassāsā kāyo upaṭṭhānaṁ sati anupassanā ñāṇaṁ. Kāyo upaṭṭhānaṁ, no sati; sati upaṭṭhānañceva sati ca. Tāya satiyā tena ñāṇena taṁ kāyaṁ anupassati. Tena vuccati— “kāye kāyānupassanāsatipaṭṭhānabhāvanā”ti. <b>Anupassatī</b>ti kathaṁ taṁ kāyaṁ anupassati …pe… evaṁ taṁ kāyaṁ anupassati. <b>Bhāvanā</b>ti catasso bhāvanā …pe… āsevanaṭṭhena bhāvanā. Passambhayaṁ kāyasaṅkhāraṁ, assāsapassāsānaṁ saṁvaraṭṭhena sīlavisuddhi, avikkhepaṭṭhena cittavisuddhi, dassanaṭṭhena diṭṭhivisuddhi. Yo tattha saṁvaraṭṭho, ayaṁ adhisīlasikkhā; yo tattha avikkhepaṭṭho, ayaṁ adhicittasikkhā; yo tattha dassanaṭṭho ayaṁ adhipaññāsikkhā. Imā tisso sikkhāyo āvajjanto sikkhati …pe… sacchikātabbaṁ sacchikaronto sikkhati, passambhayaṁ kāyasaṅkhāraṁ assāsapassāsavasena cittassa ekaggataṁ avikkhepaṁ pajānato viditā vedanā uppajjanti …pe… passambhayaṁ kāyasaṅkhāraṁ assāsapassāsavasena cittassa ekaggataṁ avikkhepaṁ pajānanto indriyāni samodhāneti …pe… tena vuccati— “samatthañca paṭivijjhatī”ti.