Saṁvaraṭṭhena sīlavisuddhi abhiññeyyā; avikkhepaṭṭhena cittavisuddhi abhiññeyyā; dassanaṭṭhena diṭṭhivisuddhi abhiññeyyā; muttaṭṭhena vimokkho abhiññeyyo; paṭivedhaṭṭhena vijjā abhiññeyyā; pariccāgaṭṭhena vimutti abhiññeyyā; samucchedaṭṭhena khaye ñāṇaṁ abhiññeyyaṁ; paṭippassaddhaṭṭhena anuppāde ñāṇaṁ abhiññeyyaṁ. [8] Chando mūlaṭṭhena abhiññeyyo; manasikāro samuṭṭhānaṭṭhena abhiññeyyo; phasso samodhānaṭṭhena abhiññeyyo; vedanā samosaraṇaṭṭhena abhiññeyyā; samādhi pamukhaṭṭhena abhiññeyyo; sati ādhipateyyaṭṭhena abhiññeyyā; paññā taduttaraṭṭhena abhiññeyyā; vimutti sāraṭṭhena abhiññeyyā; amatogadhaṁ nibbānaṁ pariyosānaṭṭhena abhiññeyyaṁ. [9] Ye ye dhammā abhiññātā honti te te dhammā ñātā honti. Taṁñātaṭṭhena ñāṇaṁ, pajānanaṭṭhena paññā. Tena vuccati— “ime dhammā abhiññeyyāti sotāvadhānaṁ, taṁpajānanā paññā sutamaye ñāṇan”ti. [1] Abhiññeyyaniddeso. Dutiyabhāṇavāro. Kathaṁ “ime dhammā pariññeyyā”ti sotāvadhānaṁ, taṁpajānanā paññā sutamaye ñāṇaṁ? Eko dhammo pariññeyyo— phasso sāsavo upādāniyo. Dve dhammā pariññeyyā— nāmañca rūpañca. Tayo dhammā pariññeyyā— tisso vedanā. Cattāro dhammā pariññeyyā— cattāro āhārā. Pañca dhammā pariññeyyā— pañcupādānakkhandhā. Cha dhammā pariññeyyā— cha ajjhattikāni āyatanāni. Satta dhammā pariññeyyā— satta viññāṇaṭṭhitiyo.