<b>Dvīhi balehī</b>ti dve balāni— samathabalaṁ, vipassanābalaṁ. Katamaṁ samathabalaṁ? Nekkhammavasena cittassekaggatā avikkhepo samathabalaṁ. Abyāpādavasena cittassekaggatā avikkhepo samathabalaṁ. Ālokasaññāvasena cittassekaggatā avikkhepo samathabalaṁ. Avikkhepavasena cittassekaggatā avikkhepo samathabalaṁ …pe… paṭinissaggānupassī assāsavasena cittassekaggatā avikkhepo samathabalaṁ. Paṭinissaggānupassī passāsavasena cittassekaggatā avikkhepo samathabalaṁ. <b>Samathabalan</b>ti kenaṭṭhena samathabalaṁ? Paṭhamena jhānena nīvaraṇe na kampatīti— samathabalaṁ. Dutiyena jhānena vitakkavicāre na kampatīti— samathabalaṁ. Tatiyena jhānena pītiyā na kampatīti— samathabalaṁ. Catutthena jhānena sukhadukkhe na kampatīti— samathabalaṁ. Ākāsānañcāyatanasamāpattiyā rūpasaññāya paṭighasaññāya nānattasaññāya na kampatīti— samathabalaṁ. Viññāṇañcāyatanasamāpattiyā ākāsānañcāyatanasaññāya na kampatīti— samathabalaṁ. Ākiñcaññāyatanasamāpattiyā viññāṇañcāyatanasaññāya na kampatīti— samathabalaṁ. Nevasaññānāsaññāyatanasamāpattiyā ākiñcaññāyatanasaññāya na kampatīti— samathabalaṁ. Uddhacce ca uddhaccasahagatakilese ca khandhe ca na kampati na calati na vedhatīti— samathabalaṁ. Idaṁ samathabalaṁ.