Ānāpānassati yassa, Paripuṇṇā subhāvitā; Kāyopi aniñjito hoti, Cittampi hoti aniñjitaṁ; Kāyopi aphandito hoti, Cittampi hoti aphanditanti. Imehi ca pana nīvaraṇehi visuddhacittassa soḷasavatthukaṁ ānāpānassatisamādhiṁ bhāvayato khaṇikasamodhānā ime aṭṭhārasa upakkilesā uppajjanti. Upakkilesañāṇaniddeso tatiyo. 1.3.4. Vodānañāṇaniddesa Katamāni terasa vodāne ñāṇāni? Atītānudhāvanaṁ cittaṁ vikkhepānupatitaṁ; taṁ vivajjayitvā ekaṭṭhāne samādahati— evampi cittaṁ na vikkhepaṁ gacchati. Anāgatapaṭikaṅkhanaṁ cittaṁ vikampitaṁ; taṁ vivajjayitvā tattheva adhimoceti— evampi cittaṁ na vikkhepaṁ gacchati. Līnaṁ cittaṁ kosajjānupatitaṁ; taṁ paggaṇhitvā kosajjaṁ pajahati— evampi cittaṁ na vikkhepaṁ gacchati. Atipaggahitaṁ cittaṁ uddhaccānupatitaṁ; taṁ viniggaṇhitvā uddhaccaṁ pajahati— evampi cittaṁ na vikkhepaṁ gacchati. Abhinataṁ cittaṁ rāgānupatitaṁ; taṁ sampajāno hutvā rāgaṁ pajahati— evampi cittaṁ na vikkhepaṁ gacchati. Apanataṁ cittaṁ byāpādānupatitaṁ; taṁ sampajāno hutvā byāpādaṁ pajahati— evampi cittaṁ na vikkhepaṁ gacchati. Imehi chahi ṭhānehi parisuddhaṁ cittaṁ pariyodātaṁ ekattagataṁ hoti.