Tīṇi kho panimāni vimokkhamukhāni lokaniyyānāya saṁvattanti. Sabbasaṅkhāre paricchedaparivaṭumato samanupassanatāya animittāya ca dhātuyā cittasampakkhandanatāya, sabbasaṅkhāresu manosamuttejanatāya appaṇihitāya ca dhātuyā cittasampakkhandanatāya, sabbadhamme parato samanupassanatāya suññatāya ca dhātuyā cittasampakkhandanatāya— imāni tīṇi vimokkhamukhāni lokaniyyānāya saṁvattanti. Aniccato manasikaroto kathaṁ saṅkhārā upaṭṭhanti? Dukkhato manasikaroto kathaṁ saṅkhārā upaṭṭhanti? Anattato manasikaroto kathaṁ saṅkhārā upaṭṭhanti? Aniccato manasikaroto khayato saṅkhārā upaṭṭhanti, dukkhato manasikaroto bhayato saṅkhārā upaṭṭhanti, anattato manasikaroto suññato saṅkhārā upaṭṭhanti. Aniccato manasikaroto kiṁ bahulaṁ cittaṁ hoti? Dukkhato manasikaroto kiṁ bahulaṁ cittaṁ hoti? Anattato manasikaroto kiṁ bahulaṁ cittaṁ hoti? Aniccato manasikaroto adhimokkhabahulaṁ cittaṁ hoti. Dukkhato manasikaroto passaddhibahulaṁ cittaṁ hoti. Anattato manasikaroto vedabahulaṁ cittaṁ hoti.