Dassanamaṇḍo sammādiṭṭhi, micchādiṭṭhi kasaṭo; micchādiṭṭhiṁ kasaṭaṁ chaḍḍetvā sammādiṭṭhiyā dassanamaṇḍaṁ pivatīti— maṇḍapeyyaṁ. Abhiniropanamaṇḍo sammāsaṅkappo, micchāsaṅkappo kasaṭo; micchāsaṅkappaṁ kasaṭaṁ chaḍḍetvā sammāsaṅkappassa abhiniropanamaṇḍaṁ pivatīti— maṇḍapeyyaṁ. Pariggahamaṇḍo sammāvācā, micchāvācā kasaṭo; micchāvācaṁ kasaṭaṁ chaḍḍetvā sammāvācāya pariggahamaṇḍaṁ pivatīti— maṇḍapeyyaṁ. Samuṭṭhānamaṇḍo sammākammanto, micchākammanto kasaṭo; micchākammantaṁ kasaṭaṁ chaḍḍetvā sammākammantassa samuṭṭhānamaṇḍaṁ pivatīti— maṇḍapeyyaṁ. Vodānamaṇḍo sammāājīvo, micchāājīvo kasaṭo; micchāājīvaṁ kasaṭaṁ chaḍḍetvā sammāājīvassa vodānamaṇḍaṁ pivatīti— maṇḍapeyyaṁ. Paggahamaṇḍo sammāvāyāmo, micchāvāyāmo kasaṭo; micchāvāyāmaṁ kasaṭaṁ chaḍḍetvā sammāvāyāmassa paggahamaṇḍaṁ pivatīti— maṇḍapeyyaṁ. Upaṭṭhānamaṇḍo sammāsati, micchāsati kasaṭo; micchāsatiṁ kasaṭaṁ chaḍḍetvā sammāsatiyā upaṭṭhānamaṇḍaṁ pivatīti— maṇḍapeyyaṁ. Avikkhepamaṇḍo sammāsamādhi, micchāsamādhi kasaṭo; micchāsamādhiṁ kasaṭaṁ chaḍḍetvā sammāsamādhissa avikkhepamaṇḍaṁ pivatīti— maṇḍapeyyaṁ. Atthi maṇḍo, atthi peyyaṁ, atthi kasaṭo. Adhimokkhamaṇḍo saddhindriyaṁ, assaddhiyaṁ kasaṭo; yo tattha attharaso dhammaraso vimuttiraso— idaṁ peyyaṁ. Paggahamaṇḍo vīriyindriyaṁ, kosajjaṁ kasaṭo; yo tattha attharaso dhammaraso vimuttiraso— idaṁ peyyaṁ. Upaṭṭhānamaṇḍo satindriyaṁ, pamādo kasaṭo; yo tattha attharaso dhammaraso vimuttiraso— idaṁ peyyaṁ. Avikkhepamaṇḍo samādhindriyaṁ, uddhaccaṁ kasaṭo; yo tattha attharaso dhammaraso vimuttiraso— idaṁ peyyaṁ. Dassanamaṇḍo paññindriyaṁ, avijjā kasaṭo; yo tattha attharaso dhammaraso vimuttiraso— idaṁ peyyaṁ.