อุทฺทานํ

กุฏชา ๑ พนฺธุชีวี จ โกตุมฺพริกหตฺถิโย

อิสิมุคฺโค จ โพธิ จ เอกจินฺตี ติกณฺณิโก

เอกจารี ติวณฺฏี จ คาถา สฏฺฐี ๒ ปกิตฺติตาติ ฯ

กุฏชปุปฺผิยวคฺโค เอกูนวีสติโม ฯ

________________________

วีสติโม ตมาลปุปฺผิยวคฺโค

ปฐมํ ตมาลปุปฺผิยตฺเถราปทานํ (๑๙๑)

[๑๙๓] จุลฺลาสีติสหสฺสานิ ถมฺโภ โสวณฺณโย อหุ

เทวลฏฺฐิปฏิภาคํ วิมานํ เม สุนิมฺมิตํ ฯ

ตมาลปุปฺผํ ปคฺคยฺห วิปฺปสนฺเนน เจตสา

พุทฺธสฺส อภิโรเปสึ สิขิโน โลกพนฺธุโน ฯ

เอกตฺตึเส อิโต กปฺเป ยํ กมฺมมกรึ ตทา

ทุคฺคตึ นาภิชานามิ พุทฺธปูชายิทํ ผลํ ฯ

อิโต วีสติเม กปฺเป จนฺทติตฺโตติ เอกโก

สตฺตรตนสมฺปนฺโน จกฺกวตฺติ มหพฺพโล ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ม. ยุ. เอกโช ฯ ๒ ม. ทฺวาสฏฺฐี กิตฺติตาติ ฯ ยุ. พาสฏฺฐี ฯ