ตตฺถทฺทสาสึ สมฺพุทฺธํ สยมฺภุํ อปราชิตํ

ปสนฺนจิตฺโต สุมโน วลฺลิผลมทาสหํ ฯ

เอกตฺตึเส อิโต กปฺเป ยํ ผลํ อททึ ตทา

ทุคฺคตึ นาภิชานามิ ผลทานสฺสิทํ ผลํ ฯ

สฺวาคตํ วต เม อาสิ มม พุทฺธสฺส สนฺติเก

ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ

กิเลสา ฌาปิตา มยฺหํ ภวา สพฺเพ สมูหตา

นาโคว พนฺธนํ เฉตฺวา วิหรามิ อนาสโว ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา วลฺลิผลทายโก เถโร อิมา คาถาโย อภาสิตฺถาติ ฯ

วลฺลิผลทายกตฺเถรสฺส อปทานํ สมตฺตํ ฯ

สตฺตมํ กทลิผลทายกตฺเถราปทานํ (๓๘๗)

[๓๘๙] กณิการํว ชลิตํ ปุณฺณมาเยว จนฺทิมํ

ชลนฺตํ ทีปรุกฺขํว อทฺทสํ โลกนายกํ ฯ

กทลิยา ๑ ผลํ คยฺห อทาสึ สตฺถุโน อหํ

ปสนฺนจิตฺโต สุมโน วนฺทิตฺวาน อปกฺกมึ ฯ #๑ ม. ยุ. กทลิผลํ ปคฺคยฺห ฯ