อคารา อภินิกฺขมฺม ปพฺพชึ อนคาริยํ
ลาภี อนฺนสฺส ปานสฺส มธุทานสฺสิทํ ผลํ ฯ
สพฺพกามสมิทฺโธหํ ภวิตฺวา เทวมานุเส
เตเนว มธุทาเนน ปตฺโตมฺหิ อาสวกฺขยํ ฯ
วุฏฺฐมฺหิ เทเว จตุรงฺคุเล ติเณ
สุปุปฺผิเต ธรณีรุเห วปฺปเทเส ๑
สุญฺเญ ฆเร มณฺฑปรุกฺขมูลเก
วสามิ นิจฺจํ สุขิโต อนาสโว ฯ
มชฺเฌ ๒ มยฺหํ ภวา อสฺสุ เย ภเว สมติกฺกมึ
อชฺช เม อาสวา ขีณา นตฺถิ ทานิ ปุนพฺภโว ฯ
ตึสกปฺปสหสฺสมฺหิ ยํ ทานมททึ ตทา
ทุคฺคตึ นาภิชานามิ มธุทานสฺสิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
สพฺพาสวา ปริกฺขีณา นตฺถิ ทานิ ปุนพฺภโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา มธุทายโก เถโร อิมา คาถาโย อภาสิตฺถาติ ฯ
มธุทายกตฺเถรสฺส อปทานํ สมตฺตํ ฯ
#๑ ม. สญฺฉนฺเน ฯ ยุ. จ ฉปฺปเท ฯ ๒ ม. มชฺเฌ มหนฺเต หีเน จ ภเว สพฺเพ อติกฺกมึ ฯ