มุขปุญฺฉนํ ๑ สุคเต ทตฺวา สงฺเฆ คณวรุตฺตเม

ปญฺจานิสํเส อนุโภมิ กมฺมานุจฺฉวิเก มม ฯ

สุวณฺณวณฺโณ วิรโช สปฺปภาโส ปตาปวา

สินิทฺธํ โหติ เม คตฺตํ รโชชลฺลํ น ลิมฺปติ ฯ

อิเม คุเณ ปฏิลเภ ตสฺส นิสฺสนฺทโต อหํ

กตฺตรทณฺเฑ สุคเต ทตฺวา สงฺเฆ คณวรุตฺตเม ๒ ฯ

ปญฺจานิสํเส ๓ อนุโภมิ กมฺมานุจฺฉวิเก มม

ปุตฺตา มยฺหํ พหู โหนฺติ ตาโส มยฺหํ น วิชฺชติ ฯ

อปฺปสโยฺห สทา โหมิ สพฺพารกฺเขหิ รกฺขิโต

ขลิตมฺปิ ๔ น ชานามิ อภนฺตํ มานสํ มม ฯ

โอสถํ อญฺชนํ ทตฺวา สงฺเฆ ๕ คณวรุตฺตเม

อฏฺฐานิสํเส อนุโภมิ กมฺมานุจฺฉวิเก มม ฯ

วิสาลนยโน โหมิ เสตปิโต จ โลหิโต

อนาวิลปสนฺนกฺโข สพฺพโรควิวชฺชิโต ฯ

ลภามิ ทิพฺพนยนํ ปญฺญาจกฺขุํ อนุตฺตรํ

อิเม คุเณ ปฏิลเภ ตสฺส นิสฺสนฺทโต อหํ ฯ

กุญฺจิเก สุคเต ทตฺวา สงฺเฆ คณวรุตฺตเม

ธมฺมทฺวารวิวรณํ ลภามิ ญาณกุญฺจิกํ ฯ

กุญฺจิกานํ ฆเร ทตฺวา สงฺเฆ ๖ คณวรุตฺตเม

ทฺวานิสํเส อนุโภมิ กมฺมานุจฺฉวิเก มม ฯ #๑ ม. ยุ. มุขปุญฺฉนโจเล ทตฺวา พุทฺเธ คณุตฺตเม ฯ ๒ ม. คณุตฺตเม ฯ #๓ ม. ยุ. ฉานิสํเส ฯ ๔ ยุ. ชลิตํ มํ น ชานามิ ฯ ๕-๖ ม. ยุ. พุทฺเธ #สงฺเฆ คณุตฺตเม ฯ