สเจ วเสยฺย อคารํ จกฺกวตฺติ ภเวยฺย โส

อฏฺฐานเมตํ ยํ ตาทิ อคาเร รติมชฺฌคา ฯ

นิกฺขมิตฺวา อคารมฺหา ปพฺพชิสฺสติ สุพฺพโต

ราหุโล นาม นาเมน อรหา โส ภวิสฺสติ ฯ

กิกีว อณฺฑํ รกฺเขยฺย จามรีริว วาลธึ

นิปโก สีลสมฺปนฺโน มมํ ทกฺขิ ๑ มหามุนิ ฯ

ตสฺสาหํ ธมฺมมญฺญาย วิหาสึ สาสเน รโต

สพฺพาสเว ปริญฺญาย วิหรามิ อนาสโว ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา ราหุโล เถโร อิมา คาถาโย อภาสิตฺถาติ ฯ

ราหุลตฺเถรสฺส อปทานํ สมตฺตํ ฯ

สตฺตมํ อุปเสนวงฺคนฺตปุตฺตตฺเถราปทานํ (๑๗)

[๑๙] ปทุมุตฺตรํ ภควนฺตํ โลกเชฏฺฐํ นราสภํ

ปพฺภารมฺหิ นิสินฺนํ ๒ ตํ อุปคญฺฉึ นรุตฺตมํ ฯ

กณิการํ ๓ ปุปฺผิตํ ทิสฺวา วณฺเฏ เฉตฺวาน ตํ ตทา

อลงฺกริตฺวา ฉตฺตมฺหิ พุทฺธสฺส อภิโรปยึ ฯ #๑ โป. อชฺช รกฺเข มหามุนิ ฯ ม. ยุ. .. รกฺขิ .. ฯ ๒ ม. นิสีทนฺตํ ฯ #๓ ม. กณิการปุปฺผํ ฯ