อวิทูเร โปกฺขรณี จกฺกวากุปกุชฺชิตา

มนฺทาลเกหิ สญฺฉนฺนา ปทุมุปฺปลเกหิ จ ฯ

อจฺโฉทกา สีตชลา สุปติตฺถา มโนรมา

อจฺฉา ผลิกสมานา โสภนฺติ มม อสฺสมํ ฯ

ปทุมา ปุปฺผเร ตตฺถ ปุณฺฑรีกา จ อุปฺปลา

มนฺทาลเกหิ สญฺฉนฺนา โสภนฺติ มม อสฺสมํ ฯ

ปาฐีนา ปาวุสา มจฺฉา พลชา มุญฺชโรหิตา

วิจรนฺตาว เต ตตฺถ โสภนฺติ มม อสฺสมํ ฯ

กุมฺภีลา สสสุมารา จ กจฺฉปา จ คหา พหู

โอคหา ๑ อชครา จ โสภนฺติ มม อสฺสมํ ฯ

ปาเรวตา รวิหํสา จกฺกวากา นทีจรา

ทินฺทิภา ๒ สาลิกา เจว โสภนฺติ มม อสฺสมํ ฯ

นยิตา อมฺพคนฺธี จ เกตกา ตตฺถ ปุปฺผิตา

ทิพฺพา คนฺธา สมฺปวนฺตา โสภนฺติ มม อสฺสมํ ฯ

สีหา พฺยคฺฆา จ ทีปี จ อจฺฉโกกตรจฺฉโย

อนุสญฺจรนฺตา ปวเน โสภนฺติ มม อสฺสมํ ฯ

ชฏาภาเรน ภริตา อชินุตฺตรวาสิโน

อนุสญฺจรนฺตา ปวเน โสภนฺติ มม อสฺสมํ ฯ

อชินานิ ธรา เอเก ๓ นิปกา สนฺตวุตฺติโน

อปฺปาหารา จ เต สพฺเพ โสภนฺติ มม อสฺสมํ ฯ #๑ ยุ. โอคุหา ฯ ๒ ม. จนฺทิภา ฯ ๓ ม. ยุ. เอเต ฯ