ปทุมุตฺตรพุทฺธสฺส ธมฺมเมเฆน คชฺชโต ๑

สทฺเทน ธมฺมเมฆสฺส ธมฺมคพฺภํ อคณฺหหํ ฯ

สตสหสฺสํ อุปาทาย ปุญฺญคพฺภํ ธเรมหํ

นปฺปมุญฺจามิ ภารโต ธมฺมเมโฆ น คชฺชติ ฯ

ยทา ตุวํ สกฺยมุนิ รมฺเม กาปิลวตฺถเว

คชฺชสิ ธมฺมเมเฆน ภารโต ปริมุจฺจหํ ฯ

สุญฺญตํ อนิมิตฺตญฺจ อถาปณิหิตํปิ ๒ จ

จตุโร จ ผเล สพฺเพ ธมฺมํ ๓ วิชฏิ ตํปิหํ ฯ

ทุติยภาณวารํ ฯ

อปริเมยฺยํ อุปาทาย ปตฺเถมิ ตว สาสนํ

โส เม อตฺโถ อนุปฺปตฺโต สนฺติปทํ อนุตฺตรํ ฯ

วินเย ปารมึ ปตฺโต ยถาปิ ปาฐิโก อิสี

น เม สมสโม อตฺถิ ธาเรมิ สาสนํ อหํ ฯ

วินเย ขนฺธเก จาปิ ติกจฺเฉเทว ปญฺจเก

เอตฺถ เม วิมติ นตฺถิ อกฺขเร พฺยญฺชเนปิ วา ฯ

นิคฺคเห ปฏิกมฺเม จ ฐานาฐาเน จ โกวิโท

โอสารเณ วุฏฺฐาปเน สพฺพตฺถ ปารมึ คโต ฯ

วินเย ขนฺธเก จาปิ ๔ นิกฺขิปิตฺวา ปทํ อหํ

อุภโต ๕ วิภงฺเค เจว รสโต โอสเรยฺยหํ ฯ #๑ โป. คชฺชิโต ฯ ๒ ม. ยุ. ตถาปฺปณิหิตมฺปิ จ ฯ ๓ ม. ธมฺเมวํ วิชนยึ อหํ ฯา #ยุ. ... วิชฏายหํ ฯ ๔ ม. วาปิ ฯ ๕ ม. ยุ. อุภโต วินิเวเฐตฺวา ฯ