อฏฺฐมํ อมฺพทายกตฺเถราปทานํ (๖๘)
[๗๐] อโนมทสฺสี ภควา นิสินฺโน ปพฺพตนฺตเร
เมตฺตาย อผริ โลเก อปฺปมาเณ นิรูปธิ ฯ
กปิ อหํ ตทา อาสึ หิมวนฺเต นคุตฺตเม
ทิสฺวา อโนมมธิกํ ๑ พุทฺเธ จิตฺตํ ปสาทยึ ฯ
อวิทูเร หิมวนฺตสฺส อมฺพาสุํ ผลิโน ตทา
ตโต ปกฺกํ คเหตฺวาน อมฺพํ สมธุกํ อทํ ฯ
ตมฺเม พุทฺโธ วิยากาสิ อโนมทสฺสี มหามุนิ
อิมินา มธุทาเนน อมฺพปาเนน จูภยํ ฯ
สตฺตปญฺญาสกปฺปานิ เทวโลเก รมิสฺสติ
อวเสเสสุ กปฺเปสุ โวกิณฺณํ สํสริสฺสติ ฯ
เขเปตฺวา ปาปกํ กมฺมํ ปริปกฺกาย วุทฺธิยา ๒
วินิปาตาทิหาคนฺตฺวา กิเลเส ฌาปยิสฺสติ ฯ
ทเมน อุตฺตเมนาหํ ทมิโตมฺหิ มเหสินา
ปตฺโตมฺหิ อจลํ ฐานํ หิตฺวา ชยปราชยํ ฯ
สตฺตสตฺตติกปฺปสเต อมฺพฏฺฐชยนามกา ๓
จตุทฺทสา เต ราชาโน จกฺกวตฺตี มหพฺพลา ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ม. อโนมทสฺสึ ตํ ฯ ยุ. อโนมมมิตํ ฯ ๒ ม. ยุ. พุทฺธิยา ฯ #๓ ม. ยุ. อมฺพฏฺฐชสนามกา ฯ