ปญฺจมํ ผุสฺสิตกมฺมิยตฺเถราปทานํ (๓๓๕)

[๓๓๗] วิปสฺสี นาม สมฺพุทฺโธ โลกเชฏฺโฐ นราสโภ

ขีณาสเวหิ สหิโต สงฺฆาราเม วสี ตทา ฯ

อารามทฺวารา นิกฺขมฺม วิปสฺสี โลกนายโก

สห สตสหสฺเสหิ อฏฺฐขีณาสเวหิ โส ฯ

อชิเนน นิวตฺโถหํ วากจีรธโรปิ จ

กุสุมฺโภทกมาทาย ๑ สมฺพุทฺธํ อุปสงฺกมึ ฯ

สกํ จิตฺตํ ปสาเทตฺวา เวทชาโต กตญฺชลี

กุสุมฺโภทกมาทาย ๒ พุทฺธมพฺภุกิรึ ๓ อหํ ฯ

เตน กมฺเมน สมฺพุทฺโธ ชลชุตฺตมนามโก

มม กมฺมํ ปกิตฺเตตฺวา อคมา เยน ปตฺถิตํ ฯ

ผุสฺสิตา ปญฺจสหสฺสา เยหิ ปูเชสหํ ชินํ

อฑฺฒเตยฺยสหสฺเสหิ เทวรชฺชมการยึ ฯ

อฑฺฒเตยฺยสหสฺเสหิ จกฺกวตฺติ อโหสหํ

อวเสเสน กมฺเมน อรหตฺตํ อปาปุณึ ฯ

เทวราชา ยทาโหสึ ๔ มนุชาธิปติ ตทา ๕

ตํเยว นามเธยฺยํ เม ผุสฺสิโต นามโหสหํ ๖ ฯ๐

เทวภูตสฺส สนฺตสฺส อถาปิ มานุสสฺส วา

สมนฺตา พฺยามโต มยฺหํ ผุสฺสิตํปิ ๗ ปวสฺสติ ฯ #๑-๒ ม. กุสุโมทกมาทาย ฯ ๓ ม. ยุ. พุทฺธมพฺภุกฺกิรึ ฯ ๔ ม. ยุ. ยถา โหมิ ฯ #๕ ม. ยทา ฯ ยุ. ยถา ฯ ๖ ม. ยุ. นามโหมหํ ฯ ๗ ม. ยุ. ผุสฺสิตํว ฯ