อิโต จตุตฺถเก กปฺเป ทุมหโร ๑ สุ ขตฺติโย

จาตุรนฺโต วิชิตาวี จกฺกวตฺติ มหพฺพโล ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา สุสญฺญโก ๒ เถโร อิมา คาถาโย อภาสิตฺถาติ ฯ

สุสญฺญกตฺเถรสฺส ๓ อปทานํ สมตฺตํ ฯ

จตุตฺถํ ภิสาลุวทายกตฺเถราปทานํ (๗๔)

[๗๖] กานนํ วนโมคฺคยฺห วสามิ ปวเน ๔ อหํ

วิปสฺสึ อทฺทสํ พุทฺธํ อาหุตีนํ ปฏิคฺคหํ ฯ

ภิสาลุวญฺจ ปาทาสึ อุทกํ หตฺถโธวนํ

วนฺทิตฺวา สิรสา ปาเท ปกฺกามิ อุตฺตรามุโข ฯ

เอกนวุเต อิโต กปฺเป ภิสาลุวํ อทํ ตทา

ทุคฺคตึ นาภิชานามิ ปุญฺญกมฺมสฺสิทํ ผลํ ฯ

อิโต จ ตติเย กปฺเป ภิสสมฺมตขตฺติโย

สตฺตรตนสมฺปนฺโน จกฺกวตฺติ มหพฺพโล ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ม. ทุมสาโร สิ ฯ ยุ. ทุมสาโร สุ ฯ ๒ ม. พุทฺธสญฺญโก ฯ ยุ. สญฺญโก ฯ #๓ พุทฺธสญฺญกตฺเถรสฺสาปทานํ ฯ ๔ โป. ปิวเน ฯ ม. วิปิเน ฯ ยุ. วิวเน ฯ