เอกาทเส กปฺปสเต โคสุชาตสนามโก

สตฺตรตนสมฺปนฺโน จกฺกวตฺติ มหพฺพโล ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา เทสปูชโก เถโร อิมา คาถาโย อภาสิตฺถาติ ฯ

เทสปูชกตฺเถรสฺส อปทานํ สมตฺตํ ฯ

ปญฺจมํ กณิการฉทนิยตฺเถราปทานํ (๑๖๕)

[๑๖๗] เวสฺสภู นาม สมฺพุทฺโธ โลกเชฏฺโฐ นราสโภ

ทิวาวิหาราย มุนิ โอคาหยิ ๑ มหาวนํ ฯ

กณิการํ โอจินิตฺวา ฉตฺตํ กตฺวานหนฺตทา

ปุปฺผจฺฉทนํ กตฺวาน พุทฺธสฺส อภิโรปยึ ฯ

เอกตฺตึเส อิโต กปฺเป ยํ ปุปฺผํ อภิโรปยึ

ทุคฺคตึ นาภิชานามิ พุทฺธปูชายิทํ ผลํ ฯ

อิโต วีสติกปฺปมฺหิ โสณฺณาภา อฏฺฐ ขตฺติยา

สตฺตรตนสมฺปนฺนา จกฺกวตฺตี มหพฺพลา ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ โป. โอโรหิตฺวา ฯ ยุ. โอคาหิตฺวา ฯ