เอกตาฬีสิโต กปฺเป วรุโณ ๑ นาม ขตฺติโย
สตฺตรตนสมฺปนฺโน จกฺกวตฺติ มหพฺพโล ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา คนฺธปุปฺผิโย เถโร อิมา คาถาโย อภาสิตฺถาติ ฯ
คนฺธปุปฺผิยตฺเถรสฺส อปทานํ สมตฺตํ ฯ
ทสมํ ปทุมปูชกตฺเถราปทานํ (๑๓๐)
[๑๓๒] หิมวนฺตสฺสวิทูเร โคตโม นาม ปพฺพโต
นานารุกฺเขหิ สญฺฉนฺโน มหาภูตคณาลโย ฯ
เวมชฺฌมฺหิ จ ตสฺสาสิ อสฺสโม อภินิมฺมิโต
ปุรกฺขโต สสิสฺเสหิ วสามิ อสฺสเม อหํ ฯ
อายนฺตุ เม สิสฺสคณา ปทุมํ อาหรนฺตุ เม
พุทฺธปูชํ กริสฺสามิ ทิปทินฺทสฺส ตาทิโน ฯ
เอวนฺติ เต ปฏิสฺสุตฺวา ปทุมํ อาหรึสุ เม
ตถา นิมิตฺตํ กตฺวาหํ พุทฺธสฺส อภิโรปยึ ฯ
สิสฺเส ตทา สมาเนตฺวา สาธุกํ อนุสาสหํ
มา โข ตุเมฺห ปมชฺชิตฺถ อปฺปมาโท สุขาวโห ฯ #๑ ม. จรโณ. ยุ. วรโณ ฯ