อิโต เตรสกปฺปมฺหิ ทฺวาทสาสุํ พลุคฺคตา ๑

สตฺตรตนสมฺปนฺนา จกฺกวตฺตี มหพฺพลา ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา สุทสฺสโน เถโร อิมา คาถาโย อภาสิตฺถาติ ฯ

สุทสฺสนตฺเถรสฺส อปทานํ สมตฺตํ ฯ

ตติยํ จนฺทนปูชกตฺเถราปทานํ (๑๓๓)

[๑๓๕] จนฺทภาคานทีตีเร อโหสึ กินฺนโร ตทา

ปุปฺผภกฺโข จหํ อาสึ ปุปฺผานํ วสโน อหํ ๒ ฯ

อตฺถทสฺสี ตุ ภควา โลกเชฏฺโฐ นราสโภ

ปวนคฺเคน ๓ นิยฺยาสิ ๔ หํสราชาว อมฺพเร ฯ

นโม เต ปุริสาชญฺญ จิตฺตํ เต สุวิโสธิตํ

ปสนฺนมุขวณฺโณสิ วิปฺปสนฺนมุขินฺทฺริโย ฯ

โอโรหิตฺวาน อากาสา ภูริปญฺโญ สุเมธโส

สงฺฆาฏึ ปตฺถริตฺวาน ปลฺลงฺเกน อุปาวิสิ ฯ

วิลินํ จนฺทนาทาย อคมาสึ ชินนฺติเก

ปสนฺนจิตฺโต สุมโน พุทฺธสฺส อภิโรปยึ ฯ #๑ ม. ผลุคฺคตา ฯ ยุ. ขลุคฺคตา ฯ ๒ ม. ปุปฺผานิ วสโน ตถา ฯ ยุ. ... จหํ ฯ #๓ ม. วิปินคฺเคน ฯ ๔ ยุ. นิยฺยาติ ฯ