อชฺโฌคเหตฺวา หิมวนฺตํ อคฺโค การุณิโก มุนิ

ปลฺลงฺกํ อาภุชิตฺวาน นิสีทิ ปุริสุตฺตโม ฯ

ตมทฺทสาหํ สมฺพุทฺธํ สปฺปภาสํ มโนรมํ

อินฺทีวรํว ชลิตํ อาทิตฺตํว หุตาสนํ ฯ

ชลนฺตํ ทีปรุกฺขํว วิชฺชชว ๑ คคเณ ยถา

สุผุลฺลํ สาลราชํว อทฺทสํ โลกนายกํ ฯ

อยํ นาโค มหาวีโร ทุกฺขสฺสนฺตกโร มุนิ

อิมํ ทสฺสนมาคมฺม สพฺพทุกฺขา ปมุจฺจเร ฯ

ทิสฺวานาหํ เทวเทวํ ลกฺขณํ อุปธารยึ

พุทฺโธ นุ โข น วา พุทฺโธ หนฺท ปสฺสามิ จกฺขุมํ ฯ

สหสฺสารานิ จกฺกานิ ทิสฺสนฺติ จรณุตฺตเม

ลกฺขณานิสฺส ทิสฺวาน นิฏฺฐํ คญฺฉึ ตถาคเต ฯ

สมฺมชฺชนึ คเหตฺวา สมฺมชฺชิตฺวานหํ ตทา

อฏฺฐ ปุปฺเผ สมาเนตฺวา พุทฺธเสฏฺฐํ อปูชยึ ฯ

ปูชยิตฺวาน ตํ พุทฺธํ โอฆติณฺณมนาสวํ

เอกํสํ อชินํ กตฺวา นมสฺสึ โลกนายกํ ฯ

เยน ญาเณน สมฺพุทฺโธ วิหรติ อนาสโว

ตํ ญาณํ กิตฺตยิสฺสามิ สุณาถ มม ภาสโต ฯ

สมุทฺธรยิมํ โลกํ สยมฺภุ อมิโตทย

ตว ทสฺสนมาคมฺม กงฺขาโสตํ ตรนฺติ เต ฯ #๑ ม. วิชฺชุตํ ฯ