อญฺชลึ ปคฺคเหตฺวาน สีเส กตฺวาน วนฺทนํ ๑

สมฺพุทฺธํ อภิวาเทตฺวา อิมา คาถา อภาสถ ๒ ฯ

วสฺสิเก ปุปฺผมานสฺมึ สนฺติเก อุปวายติ

ตฺวํ วีร คุณคนฺเธน ทิสา สพฺพา ปวายสิ ฯ

จมฺปเก นาคมลิเก ๓ อธิมุตฺตกเกตเก

สาเลสุ ปุปฺผมาเนสุ อนุวาตํ ปวายติ ฯ

ตว คนฺธํ ฆายิตฺวาน ๔ หิมวนฺตา อิธาคมึ

ปูเชมิ ตํ มหาวีร โลกเชฏฺฐ มหายส ฯ

วรจนฺทเนนานุลิมฺปึ สุเมธํ โลกนายกํ

สกํ จิตฺตํ ปสาเทตฺวา ตุณฺหี อฏฺฐาสิ ตาวเท ฯ

สุเมโธ นาม ภควา โลกเชฏฺโฐ นราสโภ

ภิกฺขุสงฺเฆ นิสีทิตฺวา อิมา คาถา อภาสถ ฯ

โย เม คุณํ ๕ ปกิตฺเตสิ จนฺทนญฺจ อปูชยิ

ตมหํ กิตฺตยิสฺสามิ สุณาถ มม ภาสโต ฯ

อาเทยฺยวากฺยวจโน พฺรหฺมา อุชุ ปตาปวา

ปญฺจวีสติกปฺปานิ สปฺปภาโส ภวิสฺสติ ฯ

ฉพฺพีสติกปฺปสเต เทวโลเก รมิสฺสติ

สหสฺสกฺขตฺตุํ ราชา จ จกฺกวตฺติ ภวิสฺสติ ฯ

เตตฺตึสกฺขตฺตุํ เทวินฺโท เทวรชฺชํ กริสฺสติ

ปเทสรชฺชํ วิปุลํ คณนาโต อสงฺขยํ ฯ #๑ ม. ยุ. จนฺทนํ ฯ ๒ ม. อภาสหํ ฯ ๓ ม. ยุ. นาควนิเก ฯ #๔ ม. ยุ. สุณิตฺวาน ฯ ๕ ม. ยุ. คุเณ ฯ