ภิสิโย สุคเต ทตฺวา สงฺเฆ คณวรุตฺตเม

ฉานิสํเส อนุโภมิ กมฺมานุจฺฉวิเก มม ฯ

สมสุคตฺโตปจิโต ๑ มุทุโก จารุทสฺสโน

ลภามิ ญาณปวรํ ๒ ภิสิทานสฺสิทํ ผลํ ฯ

ตูลิกา วิกติกาโย กฏิสฺสา จิตฺตกา พหู

วรโปตฺถเก กมฺพเล จ ลภามิ วิวิเธ อหํ ฯ

ปาวารเก จ มุทุเก มุทุกาชินเวณิโย

ลภามิ วิวิธฏฺฐาเน ๓ ภิสิทานสฺสิทํ ผลํ ฯ

ยโต สรามิ อตฺตานํ ยโต ปตฺโตสฺมิ วิญฺญุตํ

อตุจฺโฉ ฌานมญฺโจมฺหิ ภิสิทานสฺสิทํ ผลํ ฯ

พิพฺโพหเน ชิเน ทตฺวา สงฺเฆ คณวรุตฺตเม

ฉานิสํเส อนุโภมิ กมฺมานุจฺฉวิเก มม ฯ

อุณฺณิเก ปทุมเก จ อโถ โลหิตจนฺทเน

พิพฺโพหเน อุปาเตมิ ๔ อุตฺตมงฺคํ สทา มม ฯ

อฏฺฐงฺคิเก มคฺควเร สามญฺเญ จตุโร ผเล

เตสุ ญาณํ อุปฺปาเทตฺวา ๕ วิหเร นิจฺจกาลิกํ ฯ

ทาเน ทเม สญฺญเม จ อปฺปมญฺญาสุ รูปิสุ

เตสุ ญาณํ อุปฺปาเทตฺวา วิหเร สพฺพกาลิกํ ฯ

วตฺเต คุเณ จ ๖ ปฏิเม อาจารกิริยาสุ จ

เตสุ ญาณํ อุปฺปาเทตฺวา วิหเร สพฺพทา อหํ ฯ #๑ ยุ. สมํ สมฺภตฺโตปจิโต ฯ ๒ ม. ยุ. ญาณปริวารํ ฯ ๓ ม. ยุ. วิวิธตฺถาเร ฯ #๔ ม. อุปาเธมิ ฯ ยุ. อุปาเทมิ ฯ ๕ ยุ. สพฺพตฺถ อุปาเนตฺวา ฯ #๖ ม. ปฏิปตฺติ ฯ ยุ. ปญฺจเม ฯ