อฏฺฐารเส กปฺปสเต ยํ พุทฺธมภิปูชยึ

ทุคฺคตึ นาภิชานามิ พุทฺธปูชายิทํ ผลํ ฯ

กิเลสา ฌาปิตา มยฺหํ ภวา สพฺเพ สมูหตา

สพฺพาสวา ปริกฺขีณา นตฺถิทานิ ปุนพฺภโว ฯ

สฺวาคตํ วต เม อาสิ มม พุทฺธสฺส สนฺติเก

ติสฺโส วิชฺชา อนุปฺปตฺตา ๑ กตํ พุทฺธสฺส สาสนํ ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา ปทุมกูฏาคาริโก เถโร อิมา คาถาโย อภาสิตฺถาติ ฯ

ปทุมกูฏาคาริกตฺเถรสฺส อปทานํ สมตฺตํ ฯ

ฉฏฺฐํ พกฺกุลตฺเถราปทานํ (๓๙๖)

[๓๙๘] หิมวนฺตสฺสวิทูเร โสภิโต นาม ปพฺพโต

อสฺสโม สุกโต มยฺหํ สกสิสฺเสหิ มาปิโต ฯ

มณฺฑปา จ พหู ตตฺถ ปุปฺผิตา สินฺทุวาริตา ๒

กปิฏฺฐา ๓ จ พหู ตตฺถ จมฺปกา ๔ นาคเกตกา ฯ

นิคุณฺฑิโย พหู ตตฺถ พทรามลกาปิ ๕ จ

ผารุสกา อลาพู จ ปุณฺฑรีกา จ ปุปฺผิตา ฯ #๑ โป. สจฺฉิกตา ฯ ๒ ม. ยุ. สินฺทุวารกา ฯ ๓ ยุ. กปิฏฺฐํ จ พหุํ ตตฺถ ฯ #๔ ม. ยุ. ปุปฺผิตา ชีวชีวกา ฯ ๕ ม. ยุ. พทรามลกานิ จ ฯ