สหสฺสราชนาเมน ตโย เต จกฺกวตฺติโน

ปญฺจสฏฺฐิกปฺปสเต จาตุรนฺตา ชนาธิปา ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา อุทกปูชโก เถโร อิมา คาถาโย อภาสิตฺถาติ ฯ

อุทกปูชกตฺเถรสฺส อปทานํ สมตฺตํ ฯ

สตฺตมํ นฬมาลิยตฺเถราปทานํ (๑๐๗)

[๑๐๙] ปทุมุตฺตรพุทฺธสฺส โลกเชฏฺฐสฺส ตาทิโน

ติณตฺถเร นิสินฺนสฺส อุปสนฺตสฺส ตาทิโน ฯ

นฬมาลํ คเหตฺวาน พนฺธิตฺวา วีชนึ อหํ

พุทฺธสฺส อุปนาเมสึ ทิปทินฺทสฺส ตาทิโน ฯ

ปฏคฺคเหตฺวาน สพฺพญฺญู วีชนึ โลกนายโก

มม สงฺกปฺปมญฺญาย อิมํ คาถํ อภาสถ ฯ

ยถา เม กาโย นิพฺพายิ ปริฬาโห น วิชฺชติ

ตเถว ติวิธคฺคีหิ จิตฺตํ ตว วิมุจฺจตุ ฯ

สพฺเพ เทวา สมาคญฺฉฉ เยเกจิ ทุมนิสฺสิตา

สุสฺสาม พุทฺธวจนํ หาสยนฺตญฺจ ทายกํ ฯ